„Made by Hands" ги поврза младите креатори со заедницата

Во организација на Ротари Клуб Скопје ИКС, во недела (14.06.2026) во Лабораториум од 12 до 18 часот, успешно се одржа настанот „Made by Hands" — кој на едно место обедини млади занаетчии, дизајнери, уметници, креативци и бројни посетители кои веруваат во вредноста на локалното творештво, одржливото производство и поддршката на младите претприемачи.

Полна сала во Лабораториум — настанот „Made by Hands", Скопје, 14 јуни 2026.

Настанот понуди уникатна можност посетителите директно да ги запознаат луѓето зад производите, да ги слушнат нивните приказни и да ги поддржат преку купување на нивните креации.

Изложувачите

Рачно изработена облека, кожни чанти и додатоци на изложбата.

Меѓу изложувачите беа Mini Green, кои преку своите биоактивни терариуми создаваат мали живи екосистеми затворени во стакло, Chvor Bags со своите рачно хеклани чанти од памучен текстил, и Trafika, бренд кој преку дигитална илустрација внесува боја, хумор и креативност во секојдневните приказни.

Chvor Bags — рачно хеклани чанти од памучен текстил.

Посетителите имаа можност да ја разгледаат и понудата на Epoxy и Julija Barbun, авторки кои преку епоксидна смола, природни материјали и диви цвеќиња создаваат уникатен накит и уметнички производи. Своите дела ги претставија и ИСКРА со своите рачно изработени еколошки свеќи од соин восок, и Niche Wood Art, кои преку рачна обработка на дрво создаваат функционални и декоративни предмети за домот.

Niche Wood Art — рачно изработени дрвени садови и декоративни предмети за домот.

Настанот беше збогатен и со присуството на Партизанска Штампа, независен колектив кој повеќе од една деценија ја негува уметноста на сито-печатот, и RED, бренд кој преку реупотреба на материјали создава уникатни модни и употребни производи, промовирајќи одржливост и креативност.

Посетители ги разгледуваат изложените производи во Лабораториум.

„The Fly Flies with Diamonds" — Посебна изложба

„The Fly Flies with Diamonds" — инсталација на Марија Милошевска, 20 години творештво.

Посебно внимание привлече изложбата „The Fly Flies with Diamonds" на авторката Марија Милошевска, која годинава одбележува 20 години творештво. Поставена во интимниот простор на галеријата во Лабораториум, изложбата понуди уникатно уметничко искуство кое преку филигранска работа, светлина и внимателно обликуван простор ги истражува темите на минливоста, трајноста и човечкото доживување.

Суспендирани стаклени дискови и светлина — детал од инсталацијата.

Покрај изложбениот дел, посетителите уживаа во музичка програма, храна и пијалоци, создавајќи атмосфера која потсетуваше на урбан пикник — простор за дружење, размена на идеи и создавање нови познанства помеѓу креативците и јавноста.

Успехот на настанот претставува дополнителен поттик за организирање нови иницијативи кои ќе продолжат да ги поддржуваат младите креатори, локалното занаетчиство и развојот на креативната економија во Македонија.

MKNews Hub · Култура · 17 јуни 2026 · Автор: Ротари Клуб Скопје ИКС