Филмот „17" на Косара Митиќ е македонски кандидат за Оскар

Долгометражниот игран филм „17", во режија на Косара Митиќ, е избран за македонски кандидат за наградата Оскар во категоријата најдобар меѓународен долгометражен филм. Одлуката ја донесе Комисијата за избор на национален кандидат при Друштвото на филмските работници на Македонија, чиј состав е одобрен од Американската академија за филмски уметности и науки.

Оваа година во изборот беа пријавени два долгометражни играни филма — „Скејтбордингот не е за девојчиња" на Дина Дума и „17" на Косара Митиќ, продукција на „Црна мачка продукција". Филмот ја имаше својата светска премиера во програмата „Перспективи" на 76. Берлински филмски фестивал, а досега освоил 11 меѓународни награди, вклучувајќи ја „Златната мимоза" за најдобра режија на Филмскиот фестивал во Херцег Нови.

„Голема професионална радост"

„Меѓународната афирмација на филмот и патот од премиерата на Берлинале па сè до изборот за македонски кандидат за Оскар е огромно професионално задоволство и истовремено потврда дека оваа интимна приказна успева да допре до публиката", изјави режисерката Митиќ по повод кандидатурата. Продуцентот Томи Салковски пак истакна дека станува збор за големо признание, но и сериозна обврска.

Во актерската екипа се Ева Костиќ, Мартина Даниловска, Ева Стојчевска, Петар Маниќ, Ирена Димеска и други. Потесниот избор за Оскар ќе биде објавен на 15 декември, а официјалните номинации на 21 јануари 2027 година.

MKNews Hub · Култура · 3 септември 2026