Мицкоски во Њу Џерси на средба со македонската дијаспора: „Каде и да се нашите луѓе, таму е и дел од Македонија"
Премиерот присуствуваше на литургија и се сретна со заедницата. Претставници на дијаспората бараат повеќе инвестиции.
Премиерот Христијан Мицкоски присуствуваше на литургија во црквата „Св. Кирил и Методиј“ во Њу Џерси, каде оствари средба со македонската заедница во САД, во рамки на неговата работна посета на Соединетите Американски Држави.
„Денеска присуствував на литургија во црквата ‚Св. Кирил и Методиј‘ во Њу Џерси, каде што остварив средба и со нашата македонска заедница. Благодарност за топлото гостопримство и за посветеноста со која Македонците во дијаспората ја чуваат врската со татковината. Нашата грижа и поддршка за македонските заедници надвор од Македонија останува силна, затоа што каде и да се нашите луѓе, таму е и дел од Македонија", напиша Мицкоски на Фејсбук.
Претседателот на црковната заедница, Тони Коцевски, ја оцени посетата како значајна. „Големо задоволство ни е да имаме ваква посета во нашата заедница, да се види премиерот со наши луѓе и да седне со нас. Тоа не може да се види и доживее секој ден", изјави Коцевски, додавајќи дека очекува поинтензивна соработка, повеќе инвестиции и подобри услови за да можат луѓето да се вратат.
Синиша Спасовски, иселеник во Њујорк, го поздрави гестот: „Овој знак на внимание од државата ни дава чувство дека не сме оставени сами на себе, туку дека нашата држава и нашите државници водат грижа за нас."
MKNews Hub · Свет · 21 септември 2026