Мицкоски замина за Вашингтон: разговори за инвестиции во енергетика и воена индустрија, го нуди и Криволак

Премиерот Христијан Мицкоски денеска замина со владина делегација на посета на Соединетите Американски Држави, каде најави средби на високо ниво во Сенатот, Конгресот и Стејт департментот, како и со претставници на американската финансиска институција ДФЦ.

Гостувајќи вечерва во централниот Дневник на МРТ 1, Мицкоски рече дека дел од разговорите ќе бидат насочени кон компании од енергетскиот сектор и напредните технологии. „Има од нивна страна пројавено интерес и за други проекти во делот на енергетиката и напредната технологија, така што сакам подлабоко да ги понудиме нашите капацитети“, рече тој.

Посебен фокус ќе биде ставен и на компании од воената индустрија што Владата сака да ги привлече да инвестираат во земјава. Во тој контекст, Мицкоски го спомена армискиот полигон Криволак. „Во фаза сме на изработка на нов закон со Министерството за одбрана, да го понудиме нашиот тренинг-полигон Криволак“, рече премиерот, додавајќи дека привлекувањето инвестиции во овој сектор би можело да придонесе за побрз економски раст.

По Вашингтон, делегацијата продолжува за Њујорк, каде Мицкоски ќе учествува на годинешното Генерално собрание на Обединетите нации. Најавени се повеќе веќе потврдени средби со државници, со фокус на земјите од соседството, а ќе се обидат и билатерални средби со делегации од Персискиот Залив. Средба со бугарската делегација, засега, не е во план.

MKNews Hub · Свет · 14 септември 2026