Мицкоски во Вашингтон на средби со конгресмените Тени и Селф, оттаму за Њујорк на Генералното собрание на ОН
Разговори за парламентарна соработка и стратешкото партнерство со САД; делегацијата продолжува за Њујорк.
Премиерот Христијан Мицкоски, кој ја предводи владината делегација во работната посета на Соединетите Американски Држави, во Вашингтон оствари средби со конгресменката Клаудија Тени и со конгресменот Кит Селф.
„Остварена средба со конгресменката Клаудија Тени, копретседавач на Македонската група за пријателство во Конгресот на САД. На средбата разговаравме за традиционално силните и пријателски односи меѓу Македонија и Соединетите Американски Држави, како и за значењето на парламентарната соработка и размената на искуства меѓу двете земји“, објави Мицкоски на Фејсбук, додавајќи дека посветеноста кон унапредување на партнерството и заедничките вредности остануваат важен темел за идната соработка.
Освен со Тени, републиканка од Њујорк, Мицкоски се сретна и со конгресменот Кит Селф, републикански претставник од Тексас и претседател на Поткомитетот за Европа во Комитетот за надворешни работи на Претставничкиот дом.
Владината делегација од Вашингтон продолжува за Њујорк, каде премиерот ќе учествува на годинешното заседание на Генералното собрание на Обединетите нации. „Имаме веќе потврдени средби. Во принцип се ориентиравме на соседството... ќе се обидеме да имаме билатерални средби и со земји од Заливот, каде цениме дека треба да градиме добри и солидни партнерски врски“, изјави Мицкоски пред заминувањето.
MKNews Hub · Свет · 17 септември 2026